සංස්කෘතික ප්රභාස්වරයෙන් මෙන් ම ස්වාභාවික සෞන්දර්යයේ අනුපමේය චාරුත්වයෙන් අලංකාර වූ, ප්රගතිශීලී ජනතාවක ගේ ජීවන අභිමානය රැඳුණු අසිරිමත් බලපිටිය ප්රාදේශීය සභා බලප්රදේශයේ සමස්ත ජනතාව වෙත ද, අප සභාවේ නිල වෙබ් අඩවිය වෙත සම්ප්රාප්ත වන දේශීය හා විදේශීය සියලු ම ගෞරවනීය පාඨක භවතුන් වෙත ද මගේ හෘදයංගම ප්රණාමය හා සාදර අභිනන්දනය පළ කර සිටිමි. ජනතාවගේ සදාතනික සුබසෙත උදෙසා ම කැප වූ පළාත් පාලන ආයතනයක නායකයා ලෙස, බලපිටිය ප්රාදේශීය සභාවේ ගරු සභාපති පදවිය උසුලමින් ඔබ හමුවේ මෙම ප්රකාශය තැබීමට ලැබීම මගේ ජීවිතයේ අතිශය අභිමානවත් මෙන් ම සම්භාවනීය සංධිස්ථානයක් ලෙස මම සලකමි. නූතන තොරතුරු තාක්ෂණයේ මහෝපකාරී දායකත්වය පෙරදැරි කරගනිමින්, අප බලපිටිය ප්රාදේශීය සභාව සහ ජනතාව අතර පවතින සන්නිවේදන සබඳතාව තවදුරටත් සවිමත් කරමින්, වඩාත් විනිවිදභාවයෙන් යුතු, කාර්යක්ෂම හා ජනතාකාරී සේවාවක් සැලසීම සඳහා මෙම තාක්ෂණික මාවත විවර කර දීමට හැකි වීම අප ලද මහා ජයග්රහණයකි.
මහා සාගරයේ රිදී තරංග මාලාවන්ගෙන් වට වූ වෙරළ තීරයකට ද, ජෛව විවිධත්වයේ අසිරිය පසක් කරන සුන්දර මාදූ ගං කොමලිය ගේ අලංකාරයට ද හිමිකම් කියන අප බලපිටිය, අතීතයේ සිට ම මෙරට සමාජීය, සංස්කෘතික හා දේශපාලනික ක්ෂේත්රයන් හි ප්රභාස්වර සලකුණු තැබූ උදාර භූමි භාගයකි. රටට, ජාතියට හා සමයට අනූපමේය මෙහෙවරක් ඉටු කළ ශ්රේෂ්ඨ යතිවරයාණන් වහන්සේලා ගේ ද, උගත්, බුද්ධිමත්, වීරප්රතාපවත් පූර්වගාමී පූර්වජයන් ගේ ද අනුස්මරණීය මතකයන්ගෙන් සමෘද්ධිමත් වූ බලපිටිය, අද වනවිට දකුණු ලක ප්රගතිශීලී සංවර්ධනයේ මධ්යස්ථානයක් බවට පත් වෙමින් පවතින්නේ ය. පරම්පරා ගණනාවක් තිස්සේ අප ලබා ගත් ඒ පාරම්පරික අභිමානයත්, උරුමයත් ආරක්ෂා කරගනිමින්, වර්තමානයේ අභියෝගයන්ට සාර්ථක ව මුහුණ දී, අනාගත පරම්පරාව උදෙසා සුරක්ෂිත හා සෞභාග්යමත් බලපිටියක් දායාද කිරීම අප සැම ගේ මහා ජාතික හා සාමාජීය වගකීම වන්නේ ය.
ජනතාවට වඩාත් ම සමීපතම රාජ්ය පාලන ස්තරය වන්නේ පළාත් පාලන ආයතනය යි. එ බැවින් බලපිටිය ප්රාදේශීය සභාව යනු හුදෙක් පරිපාලනමය තීරණ ගන්නා ආයතනයක් පමණක් නො වේ. එය බලපිටිය වැසි ජනතාවගේ එදිනෙදා ජීවිතයේ සුඛ විහරණය, සෞඛ්යාරක්ෂාව, සන්සුන් පැවැත්ම හා භෞතික සංවර්ධනය සහතික කරනු ලබන මහා නිවහන යි. මා සභාපති පදවියට සම්ප්රාප්ත වූ මොහොතේ සිට ම මගේ ප්රධානතම අභිප්රාය වූයේ, පක්ෂ පාට හෝ ජාති ආගම් භේදයන්ගෙන් තොර ව, බලපිටියේ සියලු ම ජනතාවට සම අයිතිවාසිකම් හා සම සේවාවන් හිමි වන පාරදෘශ්ය පාලන තන්ත්රයක් ස්ථාපිත කිරීම යි. වර්තමානය වනවිට අප සභාව මඟින් බලප්රදේශය පුරා දියත් කර ඇති විවිධ වූ යටිතල පහසුකම් නැංවීමේ ව්යාපෘතීන්, මාර්ග පද්ධති නවීකරණය කිරීමේ වැඩසටහන්, මහජන සෞඛ්ය හා අපද්රව්ය කළමනාකරණ වැඩපිළිවෙලවල් මෙන්ම, වීදි විදුලි ආලෝකකරණ ව්යාපෘතීන් ද මඟින් ජනතාවගේ දෛනික ජීවිතයේ පැහැදිලි සුබවාදී වෙනසක් ඇති කිරීමට අපට හැකියාව ලැබී තිබෙන්නේ ය.
අද වනවිට මුළු ලොව ම මෙන්ම අප රට ද නොයෙකුත් ආර්ථික හා සමාජයීය අභියෝගයන්ට මුහුණ දෙමින් සිටින්නේ ය. එ වැනි අභියෝගාත්මක කාලපරිච්ඡේදයක දී, මහජනතාව මත අධික බදු බරක් නොපටවමින්, සභාව සතු සීමිත සම්පත් අතිශය විචක්ෂණශීලී ව හා කාර්යක්ෂම ව කළමනාකරණය කරගැනීම අප හමුවේ ඇති මහා පරීක්ෂණයකි. වර්තමානයේ දී අප සභාව විසින් මහජනතාව වෙත සපයනු ලබන සියලු ම සේවාවන් ක්රමවත් කරමින්, ප්රමාදයකින් තොර ව ජනතා අවශ්යතා ඉටු කිරීම සඳහා රාජ්ය නිලධාරීන් හා කාර්ය මණ්ඩලය මෙහෙයවීමට අප කටයුතු කර තිබෙන්නේ ය. සභාවට පැමිණෙන සෑම පුරවැසියෙකුට ම ගෞරවාන්විත ව හා සුහදශීලී ව සේවය සැලසීම අපගේ ප්රධාන ම ප්රතිපත්තිය යි. නගර පවිත්රතාව රැක ගැනීම, ඩෙංගු ඇතුළු බෝවන රෝග මර්දනය කිරීම, මහජන සෞඛ්ය පරීක්ෂණ විධිමත් කිරීම හා ග්රාමීය මාර්ග අලුත්වැඩියා කිරීම වැනි කඩිනම් අවශ්යතාවයන් කෙරෙහි අපගේ පූර්ණ අවධානය නිරන්තරයෙන් ම යොමු කර ඇත්තෙමු.
අනාගතය යනු අප විසින් අද දවසේ සූදානම් කරනු ලබන සැලසුම්වල අස්වැන්න යි. බලපිටිය ප්රාදේශීය සභාවේ ඉදිරි සංවර්ධන ගමන් මඟ සැකසීමේ දී, අපගේ ප්රධානතම ඉලක්කය වන්නේ ඉදිරි දශක කිහිපය තුළ මුළු මහත් බලප්රදේශය ම නූතනත්වයට අනුගත වූ, තිරසාර මෙන් ම පාරිසරික සමතුලිතතාව සුරකින ආදර්ශමත් බලප්රදේශයක් බවට පත් කිරීම යි. බලපිටිය නගරය හා ඒ හා බැඳුණු ග්රාමීය ප්රදේශයන්හි යටිතල පහසුකම් නවීකරණය කිරීම අපගේ ප්රමුඛතම අනාගත සැලසුම යි. ඒ අනුව, සියලු ම ග්රාමීය මාර්ග කාපට් අතුරා නවීකරණය කිරීම, නගරයේ මෙන්ම ග්රාමීය ප්රදේශවල මධ්යම විදුලි ආලෝකකරණ පද්ධතිය පුළුල් කිරීම හා සෞඛ්යාරක්ෂිත සතිපොළ හා වෙළඳ සංකීර්ණ සංවර්ධනය කිරීම ඉදිරි කාලසීමාව තුළ අප විසින් දියත් කිරීමට නියමිත මහා පරිමාණ ව්යාපෘතීන් වේ.
බලපිටිය යනු ස්වාභාවික සෞන්දර්යයෙන් මෙන්ම සංචාරක ආකර්ෂණයෙන් ද පිරිපුන් භූමියකි. විශේෂයෙන් ම ජාත්යන්තර වශයෙන් ප්රසිද්ධියට පත් 'රම්සාර්' (Ramsar) තෙත්බිමක් වන මාදූ ගඟ පාරිසරික පද්ධතිය, අපට ලැබී ඇති අතිමහත් සම්පතකි. ඉදිරි අනාගතයේ දී මාදූ ගඟේ පාරිසරික අගයට හා ජෛව විවිධත්වයට කිසිදු හානියක් සිදු නො වන පරිදි, තිරසාර පාරිසරික සංචාරක ව්යාපාරය (Eco-tourism) ප්රවර්ධනය කිරීම සඳහා විශේෂ විධිමත් සැලැස්මක් අප සභාව මඟින් ක්රියාත්මක කිරීමට අපේක්ෂා කරමු. සංචාරක කර්මාන්තය තුළින් ප්රදේශයේ තරුණ තරුණියන්ට නව රැකියා උත්පාදනය කිරීමත්, ප්රදේශයේ ගෘහස්ථ ආර්ථිකය ශක්තිමත් කිරීමත් අපගේ ප්රධාන අරමුණ යි. එ සේ ම, සංචාරකයන්ගේ පැමිණීමත් සමඟ ඇති වන පරිසර දූෂණය වළක්වාලීම සඳහා විධිමත් අපද්රව්ය කළමනාකරණ ක්රමවේදයන් හා ප්ලාස්ටික් භාවිතය අවම කිරීමේ වැඩපිළිවෙලවල් තදින් ම ක්රියාත්මක කිරීමට අප සූදානම් ව සිටින්නෙමු.
අපගේ බලපිටිය භූමිය යනු ලෝක පූජිත කුරුඳු වගාවට මෙන් ම මත්ස්ය කර්මාන්තයට ද නමක් දිනූ ප්රදේශයකි. ප්රදේශයේ සම්ප්රදායික ජීවනෝපාය මාර්ගයන් සුරක්ෂිත කරමින්, ඒවා නූතන වෙළඳපොළ අවශ්යතාවයන්ට අනුකූල ව සංවර්ධනය කිරීම අපගේ අනාගත ප්රමුඛතාවයක් වන්නේ ය. කුරුඳු වගාකරුවන්, මත්ස්ය කර්මාන්තයේ නියැලෙන්නන්, සාම්ප්රදායික අත්කම් ශිල්පීන් හා කුඩා හා මධ්ය පරිමාණ ව්යාපාරිකයන් සබල ගැන්වීම උදෙසා විශේෂ වෙළඳපොළ පහසුකම් සලසා දීමටත්, ඔවුන්ගේ නිෂ්පාදන සඳහා නියමිත අගයක් එකතු කිරීමේ (value addition) වැඩසටහන් දේශීය හා විදේශීය සංවිධාන සමඟ එකතු වී දියත් කිරීමටත් අප සැලසුම් කර ඇත්තෙමු. ප්රදේශයේ ප්රජාවගේ ආර්ථිකමය ස්වාධීනත්වය ගොඩනැඟීම මඟින් සමෘද්ධිමත් ග්රාමීය ආර්ථිකයක් නිර්මාණය කිරීම අපගේ බලාපොරොත්තුව යි.
තාක්ෂණික උදාවත් සමඟ ලෝකය ම එක ම ගෝලීය ගම්මානයක් බවට පත් ව තිබෙන මෙම යුගයේ දී, බලපිටිය ප්රාදේශීය සභාව ද නූතන තාක්ෂණයෙන් සන්නද්ධ 'ස්මාර්ට් ප්රාදේශීය සභාවට' (Smart Local Authority) පරිවර්තනය කිරීම අපගේ අනාගත දැක්ම යි. මෙම නිල වෙබ් අඩවිය එහි පළමු පියවර පමණි. ඉදිරි කාලපරිච්ඡේදය තුළ සභාව වෙතින් ඉටු කරගත යුතු බදු ගෙවීම්, ගොඩනැගිලි සැලසුම් අනුමත කරගැනීම්, ව්යාපාරික බලපත්ර ලබාගැනීම් හා විවිධ සහතිකපත් ලබාගැනීම් වැනි සියලු ම සේවාවන් අන්තර්ජාලය ඔස්සේ (Online) නිවසේ සිට ම ඉටු කරගත හැකි ඩිජිටල් පද්ධතියක් (E-governance) ස්ථාපිත කිරීමට අප කටයුතු කරමින් සිටින්නෙමු. එමඟින් මහජනතාවට අප සභා ගොඩනැගිල්ල වෙත පැමිණීමට සිදු වන වාර ගණන අවම වන අතර, කාලය හා මුදල් නාස්ති වීම වැළකී, පරිපාලනය තුළ උපරිම පාරදෘශ්යභාවයක් ද ගොඩනැඟෙනු ඇත.
තිරසාර සංවර්ධනය යනු සොබාදහම සමඟ සහජීවනයෙන් පැවැත්ම යි. පරිසර පද්ධතීන් සුරැකීම වෙනුවෙන් බලපිටිය ප්රාදේශීය සභාව ඉදිරියේ දී දැඩි තීරණ රාශියක් ගැනීමට නියමිත ය. ප්ලාස්ටික් හා පොලිතීන් භාවිතය මුළුමනින් ම පාලනය කිරීම, ප්රතිචක්රීකරණය කිරීමේ විධිමත් පද්ධතීන් ප්රදේශය පුරා ස්ථාපනය කිරීම හා කොම්පෝස්ට් පොහොර නිෂ්පාදන ව්යාපෘතීන් පුළුල් කිරීම අපගේ පරිසර සුරැකීමේ අනාගත සැලසුම් අතර වේ. එ මෙන් ම, ප්රදේශයේ කොළඹගහන ස්වාභාවික ගස්වැල් පද්ධතිය සුරක්ෂිත කරමින්, 'හරිත බලපිටිය' ව්යාපෘතිය යටතේ පැළ රෝපණය කිරීමේ මහා වැඩසටහනක් ග්රාමීය මට්ටමින් ක්රියාත්මක කරනු ලබන්නේ ය. දේශගුණික විපර්යාසයන් නිසා ඇති විය හැකි ගංවතුර හා ස්වාභාවික ආපදා තත්ත්වයන්ට සාර්ථක ව මුහුණ දීම සඳහා කානු පද්ධති විධිමත් කිරීම හා පිරිසිදු කිරීම නිරන්තරයෙන් ම සිදු කරනු ලබන්නේ ය.
අපගේ අනාගත බලාපොරොත්තුව වන්නේ ප්රදේශයේ නැණවත්, ගුණවත් හා ශක්තිමත් යොවුන් පරම්පරාව යි. බලපිටියේ තරුණ පරපුරේ ක්රීඩා හා සෞන්දර්යාත්මක කුසලතාවයන් ඔප්නැංවීම උදෙසා ක්රීඩාංගණ නවීකරණය කිරීම, නව ග්රන්ථාලයීය පහසුකම් සලසා දීම හා සෞන්දර්යාත්මක මධ්යස්ථානයන් ගොඩනැඟීම අපගේ ප්රමුඛතම වගකීමක් ලෙස සලකමු. ප්රදේශයේ පුස්තකාල පද්ධතිය ඩිජිටල්කරණය කරමින්, පාසල් දරුවන්ට හා තරුණ තරුණියන්ට නූතන ලෝකයේ තොරතුරු දැනුම වෙත ලෙහෙසියෙන් ම ළඟා විය හැකි පරිසරයක් නිර්මාණය කර දෙන්නෙමු. එ මෙන් ම, වැඩිහිටි ප්රජාව, ආබාධිත තැනැත්තන් හා විපතට පත් ජනතාව වෙනුවෙන් විශේෂ සමාජ සුභසාධන වැඩසටහන් දියත් කරමින්, කිසිදු පුරවැසියෙකු අතහැර නොදමන සානුකම්පිත සමාජ වාතාවරණයක් ගොඩනැඟීමට අප බැඳී සිටින්නෙමු.
ඕනෑ ම සාර්ථක ප්රාදේශීය පාලනයක ජීවගුණය රැඳී තිබෙන්නේ ජනතාව ගේ සක්රීය සහභාගීත්වය මත යි. ප්රාදේශීය සභාව යනු මා ඇතුළු මහජන නියෝජිතයන්ගේ හෝ නිලධාරීන්ගේ පමණක් ආයතනයක් නො වේ. එය බලපිටියේ සමස්ත මහජනතාව සතු මහා පොදු වස්තුවකි. එ බැවින් අප විසින් දියත් කරනු ලබන සියලු ම සංවර්ධන වැඩසටහන් සාර්ථක කරගැනීම උදෙසා ඔබ සියලු දෙනාගේ ම පූර්ණ සහයෝගය, අදහස් හා යෝජනා අත්යවශ්ය වන්නේ ය. අපගේ පාලනය තුළ අඩුපාඩුවක් හෝ ප්රමාදයක් ඇත්නම්, ඒවා සංවේදී ව හා විවේචනාත්මක ව අප වෙත පෙන්වා දීමට ඔබට සම්පූර්ණ අයිතිය ඇත. ජනතා හඬට සැම විට ම සවන් දෙන, ජනතා මතයට ගරු කරන, ද්වේෂයෙන් හෝ වෛරයෙන් තොර වූ, විවෘත මනසකින් යුතු පාලන තන්ත්රයක් පවත්වාගෙන යාමට මා අනුපමේය ලෙස කැප වන බවට ඔබට සහතික වෙමි.
අපගේ අභිප්රාය ඉතා ම පැහැදිලි ය; අපගේ ගමන අතිශය ඍජු ය. අපට වුවමනා කරන්නේ බලපිටිය යනු දකුණු ලක පමණක් නොව, මුළු මහත් ශ්රී ලංකාවේ ම අතිශය ම සුන්දර, ආදර්ශමත්, ආරක්ෂිත හා සෞභාග්යමත් ප්රාදේශීය සභා බලප්රදේශය බවට පත් කිරීමට යි. ඒ වෙනුවෙන් මා හට පැවරී ඇති ගරු සභාපති පදවියේ වගකීම අබ මල් රේණුවක තරම්වත් අතපසු නො කර, දැඩි කැපවීමෙන්, අලසකමින් තොර ව, හෘදසාක්ෂියට එකඟ ව හා පාරදෘශ්ය ලෙස ඉටු කිරීමට මම දිවුරා පොරොන්දු වෙමි. අතීතයේ අපේ පූර්වජයන් විසින් අප වෙත දායාද කරන ලද උදාර අභිමානය හදවතින් ම දරාගෙන, වර්තමානයේ අභියෝගයන් අභීත ව ජය ගනිමින්, අනාගතයේ බැබළෙන සෞභාග්යමත් බලපිටියක් වෙනුවෙන් අපි සියලු දෙනා ම එකා වන් ව අත්වැල් බැඳගනිමු.
අපගේ මේ උදාර මාතෘ භූමියටත්, බලපිටියේ සමස්ත ආදරණීය ජනතාවටත් දීප්තිමත්, සෞභාග්යමත් හා සසිරිබර අනාගතයක් පාදනය වේවා යි මනසින් ප්රාර්ථනා කරමි!
මෙයට,
සමස්ත ජනතා සේවයට කැප වූ,
ආර්. අනුරුද්ධ මහවැලි
සභාපති,
බලපිටිය ප්රාදේශීය සභාව.
