ඓතිහාසික අභිමානයෙන්, පාරිසරික අසිරියෙන් මෙන් ම ප්රගතිශීලී ජනතාවක ගේ ජීවන පෞරුෂයෙන් මනාව පෝෂිත වූ බලපිටිය ප්රාදේශීය සභා බලප්රදේශයේ සමස්ත වාසී ජනතාව වෙත ද, අප සභාවේ නිල වෙබ් අඩවිය වෙත පිවිසෙන ලෝකවාසී සියලු ම ගෞරවනීය පාඨක භවතුන් වෙත ද මගේ හෘදයංගම ප්රණාමය හා සාදර අභිනන්දනය පළ කර සිටිමි. බලපිටිය ප්රාදේශීය සභාවේ පරිපාලනමය ප්රධානියා හෙවත් ලේකම්වරිය ලෙස, පළාත් පාලන පද්ධතියේ ප්රධාන ම විධායක කාර්යභාරය දරමින්, නූතන තොරතුරු තාක්ෂණික මාවත ඔස්සේ ඔබ හමුවේ මෙම නිල ප්රකාශය තැබීමට ලැබීම මගේ වෘත්තීය ජීවිතයේ ලත් අතිශය අභිමානවත් මෙන් ම වගකීම්සහගත අවස්ථාවක් ලෙස මම සලකමි.
පළාත් පාලන ආයතනයක් යනු මනුෂ්යයන් ගේ එදිනෙදා ජීවිතයට අතිශය ම සමීප ව බද්ධ වූ, ඔවුන් ගේ මූලික අවශ්යතාවන් ඉටු කරනු ලබන රාජ්ය තන්ත්රයේ ප්රාථමික මෙන් ම ප්රබල ම සංවේදී පුරුක යි. එහි දී මහජන ඡන්දයෙන් පත් වන දේශපාලන නායකත්වය සහ රාජ්ය සේවයේ වෘත්තීය නිලධාරීන්ගෙන් සමන්විත පරිපාලන තන්ත්රය යනු එක ම රථයක ගමන් ගන්නා රෝද දෙකක් බඳු ය. ජනතා පරමාධිපත්යය නියෝජනය කරමින් ගරු සභාපති ආර්. අනුරුද්ධ මහවැලි මැතිතුමන් සහ ගරු මන්ත්රී මණ්ඩලය විසින් ගනු ලබන මහජන හිතවාදී තීරණයන්, ප්රතිපත්ති සහ සංවර්ධන සැලසුම් සැබෑ ලෙස ම භූමියේ යථාර්ථයක් බවට පරිවර්තනය කිරීමේ මහා වගකීම පැවරෙන්නේ අප සභා පරිපාලනය වෙතට ය. ඒ අනුව, දේශපාලන නායකත්වයේ දැක්ම සහ රාජ්ය පරිපාලන නීති රීතිවල විධිමත්භාවය අතර අර්ථවත් සමතුලිතතාවක් පවත්වා ගනිමින්, ජනතාව උදෙසා උපරිම කාර්යසාධනයක් ඉටු කිරීම අපගේ ප්රධාන ම අභිප්රාය වන්නේ ය.
සභාවේ පරිපාලන නායකත්වය ලෙස මගේ පූර්ණ මෙහෙයවීම යටතේ පවතින කාර්යාලීය නිලධාරී මණ්ඩලය, තාක්ෂණික නිලධාරීන්, මහජන සෞඛ්ය පරීක්ෂකවරුන්, ක්ෂේත්ර නිලධාරීන් ඇතුළු සමස්ත සේවක මණ්ඩලය ම එක ම කණ්ඩායමක් ලෙස සබල ගැන්වීම මගේ ප්රධානතම කාර්යභාරය යි. රාජ්ය සේවය යනු හුදු රැකියාවක් පමණක් නො ව, එය මහජනතාව වෙනුවෙන් කරනු ලබන මහා කැපවීමෙන් පිරි පූජනීය මෙහෙවරක් බව මගේ නිලධාරී මණ්ඩලයේ සිතුවිලි තුළ නිරන්තරයෙන් ම තැන්පත් කිරීමට මම කටයුතු කරමින් සිටිමි. විනය, කාර්යක්ෂමතාව, අවංකභාවය, පාරදෘශ්යභාවය මෙන් ම සානුකම්පිත මනුෂ්යත්වය පෙරදැරි කරගත් සේවා සංස්කෘතියක් අප සභා පරිපාලනය තුළ ස්ථාපිත කර ඇත්තෙමු. අප සභා පරිශ්රය වෙත පැමිණෙන සෑම පුරවැසියෙකුට ම ගෞරවාන්විත ව, ප්රමාදයකින් තොර ව හා සුහදශීලී ව සිය අවශ්යතාවන් ඉටු කරගත හැකි වාතාවරණයක් පවත්වාගෙන යාම මගේ අඛණ්ඩ අධීක්ෂණය යටතේ සිදු වන්නකි.
වර්තමාන සංකීර්ණ සමාජීය හා ආර්ථික පරිසරය තුළ, බලපිටිය ප්රාදේශීය සභාව නූතන පරිපාලනමය ශක්යතාවන්ගෙන් සන්නද්ධ කිරීම අත්යවශ්ය කරුණක් බවට පත් ව තිබේ. ඒ අනුව, රාජ්ය පරිපාලන නීති, මුදල් රෙගුලාසි හා ව්යවස්ථාපිත ප්රතිපාදනවලට මුළුමනින් ම අනුකූල ව කටයුතු කරමින්, සභාව සතු මූල්ය සම්පත් හා භෞතික සම්පත් අතිශය විචක්ෂණශීලී ව කළමනාකරණය කිරීමට අප කටයුතු කර ඇත්තෙමු. මහජනතාවගෙන් එකතු කරගනු ලබන බදු මුදල් අබ මල් රේණුවක තරම්වත් නාස්ති වීමට ඉඩ නොතබා, උපරිම ඵලදායිතාවකින් යුතුව බලපිටියේ සංවර්ධනය වෙනුවෙන් යෙදවීම අපගේ මූල්ය පරිපාලනයේ පරම ධර්මතාව යි. එ මෙන් ම, රාජ්ය සේවයේ පවතින නිලධාරිවාදී බාධාවන් හා රතු පටි ක්රමවේදයන් මුළුමනින් ම නැති කරමින්, තොරතුරු තාක්ෂණයේ දායකත්වයෙන් සියලු ම සේවාවන් ඩිජිටල්කරණය (E-governance) කිරීමේ මහා වැඩපිළිවෙලක් ද දැනටමත් අප පරිපාලනය මඟින් දියත් කරමින් සිටින්නෙමු.
අනාගත බලපිටිය යනු සුරක්ෂිත, සෞඛ්ය සම්පන්න හා සෞභාග්යමත් බලප්රදේශයක් විය යුතු ය. ගරු සභාපතිතුමන් ඇතුළු මන්ත්රී මණ්ඩලය විසින් සම්මත කරනු ලබන සියලු ම අනාගත සංවර්ධන යෝජනාවන් සාර්ථක කරගැනීම උදෙසා අවශ්ය කරන නිලධාරී මෙහෙයවීම හා තාක්ෂණික පිටුබලය අඩුවක් නැත ව ලබා දීමට අප පරිපාලනය බැඳී සිටින්නේ ය. විශේෂයෙන් ම, බලපිටියේ ග්රාමීය මාර්ග පද්ධති නවීකරණය, වීදි ආලෝකකරණය, ක්රමවත් අපද්රව්ය කළමනාකරණය හා මහජන සෞඛ්ය තත්ත්වයන් ඉහළ නැංවීම වැනි ක්ෂේත්රයන්හි දී අපගේ නිලධාරීන් රාත්රී දාවල් නොබලා කැපවීමෙන් කටයුතු කරති. එ මෙන් ම, බලපිටියේ මහා සම්පතක් වන මාදූ ගඟ පාරිසරික පද්ධතිය සුරකිමින්, පරිසර හිතකාමී සංචාරක ව්යාපාරය උදෙසා රාජ්ය මට්ටමින් අවශ්ය වන සියලු ම පාරිසරික හා පරිපාලනමය අනුමැතීන් හා අධීක්ෂණයන් විධිමත් ව ඉටු කිරීමට අපගේ තාක්ෂණික කණ්ඩායම් නිරන්තරයෙන් ම සූදානම් ව සිටිති.
ඕනෑ ම ආයතනයක සාර්ථකත්වයේ ජීවගුණය රැඳී තිබෙන්නේ එහි සිටින මානව සම්පත මත යි. බලපිටිය ප්රාදේශීය සභාවේ සේවය කරන සියලු ම නිලධාරීන්ගේ හා සේවකයන්ගේ වෘත්තීය නිපුණතාව ඉහළ නැංවීම සඳහා අවශ්ය පුහුණු වැඩසටහන් නිරන්තරයෙන් ම සංවිධානය කිරීමටත්, ඔවුන්ගේ සුභසාධනය හා රැකියා තෘප්තිය ඉහළ නැංවීමටත් අප පියවර ගෙන ඇත්තෙමු. ශක්තිමත්, තෘප්තිමත් හා අභිප්රේරණය වූ කාර්ය මණ්ඩලයක් හරහා පමණක් ම මහජනතාව වෙත උසස් මට්ටමේ සේවාවක් සැලසිය හැකි බව මගේ දැඩි විශ්වාසය යි. ගරු සභාපතිතුමා ගේ නායකත්වය සහ මන්ත්රී මණ්ඩලයේ මඟපෙන්වීම යටතේ, අපගේ කාර්ය මණ්ඩලය එක ම පවුලක් මෙන් අත්වැල් බැඳගෙන බලපිටියේ අනාගත අභිවෘද්ධිය වෙනුවෙන් කැප වී සිටිති.
රාජ්ය පරිපාලනයේ විනිවිදභාවය රැකගැනීම උදෙසා මහජනතාව ගේ සක්රීය සහභාගීත්වය හා සහයෝගය අප වෙත අත්යවශ්ය වන්නේ ය. අප සභාව වෙතින් සැලසෙන සේවාවන් පිළිබඳ ව ඔබට යම් ගැටලුවක්, ප්රමාදයක් හෝ යෝජනාවක් ඇත්නම්, මෙම නිල වෙබ් අඩවිය ඔස්සේ හෝ පෞද්ගලික ව මගේ කාර්යාලය වෙත පැමිණ ඉදිරිපත් කිරීමට ඔබට පූර්ණ අයිතිය ඇත. මහජන චෝදනාවලට හා අඩුපාඩුවලට වහා ම සවන් දී, ඒවා ක්ෂණික ව නිවැරදි කිරීමට මගේ පරිපාලන තන්ත්රය සැම විට ම සූදානම් ය. ජනතාවගේ විශ්වාසය රැකගනිමින්, නීතියේ ආධිපත්යය මැනවින් සුරකිමින්, දූෂණයෙන් හා අක්රමිකතාවලින් තොර වූ ආදර්ශමත් පළාත් පාලන පරිපාලනයක් බලපිටිය තුළ පවත්වාගෙන යන බවට මම සමස්ත ජනතාව වෙත සහතික වෙමි.
ගරු සභාපතිතුමන් ගේ දූරදර්ශී නායකත්වය, ගරු මන්ත්රී මණ්ඩලයේ උපදෙස්, මගේ මෙහෙයවීම යටතේ වන කැපවූ කාර්ය මණ්ඩලයේ සේවය සහ බලපිටියේ ආදරණීය ජනතාවගේ සහයෝගය යන චතුරංගික බලවේගය එකට එක් කරගනිමින්, බලපිටිය ප්රාදේශීය සභාව මුළු ශ්රී ලංකාවට ම ආදර්ශයක් වන ප්රමුඛතම පළාත් පාලන ආයතනය බවට පත් කිරීමට අපි අදිටන් කර ගනිමු. බලපිටියේ උදාර අනාගතය වෙනුවෙන් අප ගන්නා වූ මේ සෑම ව්යායාමයකට ම ඔබ සැම ගේ ආශීර්වාදය හා සහයෝගය එක සේ අපේක්ෂා කරමි.
ඔබ සියලු දෙනාට ම සසිරිබර හා දීප්තිමත් අනාගතයක් පාදනය වේවා!
මෙයට,
සුරංගි දේශප්රිය,
ලේකම්,
බලපිටිය ප්රාදේශීය සභාව.
